កំណាព្យខ្លីទឹកដៃកវី: ផន ផល្លា (ស្នាមស្នេហ៍មេសាង)

នឹកដល់ព្រៃវែងកន្លែងកំណើត

ធម្មជាតិល្អឆើតអើតពីទ្រូងព្រៃ

មេសាងខាងកើតកំណើតកវី

បុផ្ផារីកថ្មីដែនដីមានស្នេហ៍ ។

ឳឃុំស្វាយជ្រុំជំរុំដួងចិត្ត

បុប្ផាល្អពិតលួចគិតមិនប្រែ

អូនជាបុប្ផាឃុំត្រពាំងស្រែ

ព្រៃឃ្នេសចង់តែស្នេហ៍អូនគ្រីស្នា ។

ទំនប់រលួសបងឆ្លាក់ឈ្មោះស្រី

ដិតជាប់រាល់ថ្ងៃហឫទ័យប្រាថ្នា

សូមអោយដួងចិត្តអូនដូចថ្មរដា

រឹងមិនសាវ៉ានឹងរៀមរ៉ាឡើយ ។

ឳព្រែកជីផុចបងហុចដៃកាន់

ឃុំច្រេះហុចប្រាណបងបានត្រានត្រើយ

ឳអង្គរសល្អណាស់ម៉ុមអើយ

ពោធិ៍រោងបណ្តោយកាត់ព្រៃទទឹង ។

ម្លប់ព្រីងខ្ទមស្បូវបងនៅចាំអូន

យប់ងងឹតសូន្យបងនៅសម្លឹង

ឳវាលពង្អាវជួបស្រស់ព្រលឹង

យប់ងងឹតឈឹងនាបឹងមេសាង ។

ស្នាមស្នេហ៍កវីដែនដីព្រៃវែង

ផ្សារពោធ៍ិកន្លែងបងលាតត្រដាង

អំពីស្នេហ៍ស្មោះជញ្ជៀនភស្តុតាង

ធ្វើជាសំអាងស្នេហ៍អូននិងបង ។

ថ្ងៃទី០៩ ខែមីនា  ឆ្នាំ២០១៩

ដោយ ផន ផល្លា

(មានតែអ្នកស្រុកមេសាងទេ ដែលអាចស្គាល់ឈ្មោះនៃកន្លែងទាំងអស់នេះ ចឹងហើយ សូមជូនកំនាព្យមួយនេះដល់អ្នកស្រុកមេសាង និងអ្នកដែលនៅខេត្តព្រៃវែងទាំងអស់ផងដែរ)

សូមអរគុណចំពោះអតិថិជនដែលចូលមកកាន់គេហទំព័ររបស់យើងខ្ញុំ