👉ដោយសារដី មន្រ្តីធ្វើខ្លាំង
បាញ់រាស្រ្តផូងផាំង បាំងការគិត
ងាប់អីងាប់ចោះ គ្មានអាណិត
ដុល្លារបាំងបិទ ពីអ្នកធំ ។
👉ដោយសារដី រាស្រ្តខ្មែរទឹកភ្នែក
នាំកូនចៅស្រែក ននាលយំ
ព្រោះគេជិះជាន់ ដោយបង្ខំ
តើអោយរូបខ្ញុំ រស់យ៉ាងណា?
👉ដោយសារដី មន្រ្តីគ្រាក់ៗ
បញ្ជារទាត់ធាក់ ឥតមេត្តា
អោយតែប្រជា មូលតវ៉ា
បាញ់បោះហើយថា ព្រោះខុសច្បាប់ ។
👉ឱច្បាប់អើយច្បាប់ សម្លាប់ខ្មែរ
ច្បាប់មានហូហែរ អោយខ្មែរត្រាប់
តែអស់លោកវិញ ជើងគងច្បាប់
បើរាស្រ្តខុសចាប់ គ្មានមេត្តា ។
👉តើគួរអោយសើច ឬមួយយំ
ទាំងគេទាំងខ្ញុំ ឃើញខេមរា
រងទុក្ខគ្មានស្រាក ស្រាន្តឡើយណា
តែអស់លោកថា ជាតិសុខសាន្ត ។
👉អរុណណោទ័យ ស្តីត្រឹមហ្នឹង
បើអស់លោកខឹង ក៏ខឹងបាន
តែសូមលោកគិត មនុស្សគ្រប់ប្រាណ
ងាប់យកមិនបាន អីខំម្លេះ???
(ផ្ទះការតវ៉ារឿងដីធ្លីទៀតហើយ នៅតំបន់ពយម៉ាចូវ ឃុំបិតត្រាំង ស្រុកព្រៃនប់ ខេត្តព្រះសីហនុ)
ថ្ងៃទី២៤ ខែមករា ឆ្នាំ២០១៩
ដោយ ផន ផល្លា (កវី អរុណណោទ័យ)
សូមអរគុណចំពោះអតិថិជនដែលចូលមកកាន់គេហទំព័ររបស់យើងខ្ញុំ
0 Comments
សូមអរគុណចំពោះអតិថិជនដែលចូលមកកាន់គេហទំព័ររបស់យើងខ្ញុំ